السلام عليكم و رحمة الله و بركاته

انا بخبركم من واقع تجربة سويتها اليوم الاستغلال الكبير الي صاير عندنا في بوظبي و خاصة في اسعار الخضار و الفواكة .

بما اني في يوم إجازة قلت بسير اخذ فواكة و خضرة للبيت . ظهرت و سرت سوق الخضرة الي في مينا زايد اظني تعرفونه وصلته حول 9 الصبح . المهم لاحظت شقايل المهندة و البنقال يتعاملون فالسوق وشقايل مسيطرين عالسوق بشكل غير معقول . يعني اذا مريت عواحد وما عجبك سعره ولا خذت من عنده و سرت طاولة عداله ولا بعيده شوي تسمعه يصيح عالريال بالسعر الي عطاك عشان يمشون اسعارهم الغالية عالناس.وخاصة اسعار الهمبا . ويوم احتشرت قالوا والله هالاسعار و ما تبا برايك. المهم انا ضاق صدري من تصرفاتهم و ظهرت من السوق ولا شريت . ونا فالموتر قلت خلني بسير صوب سوق الخضرة الي فالعوير فدبي اجرب الاسعار . مابا اطول عليكم بس فرق السعر غييييييييييييييييييييييييييير

الهمبا الباكستاني (صندوق خشب)

ابوظبي 25 الى 20 درهم
دبي من 15 الى 9 دراهم

الهمبا ألفونسو (كرتون)

ابوظبي 45 درهم
دبي 25 درهم

الموز الفلبيني (كرتون)

ابوظبي 55 الى 50درهم
دبي من 25 الى 30درهم


البطيخ ( اليح )

ابوظبي المن (4كيلو) 9 الى 11 درهم
دبي الحبة ب 5 دراهم بدون وزن

الخوخ

ابوظبي صندوق صغير 17 درهم
دبي نفس الصندوق 6 دراهم

طبعن هاي الفواكة بس الفرق الاكبر كان في اسعار الخضروات

الطماط (كرتون 20 كيلو)

ابوظبي 45 درهم
دبي 18 درهم

الكوسه (كرتون 10 كيلو)

ابوظبي 27 درهم
دبي 10 دراهم

البامية

ابوظبي (صندوق بلاستيكي صغير ) 20 درهم
دبي (نص كرتون موز كبير) 12 درهم

الزهرة

ابوظبي الحبة ب 7 دراهم
دبي 6 حبات في صندوق 12 درهم

الجزر

ابوظبي كيس بلاستيكي كبير 30 درهم
دبي كيس بلاستيكي كبير 12 درهم
طبعن هاي بس عينات من الاغراض الي خذتها بس الي مستغرب منه فرق السعر الرهيب + طريقة التعامل في دبي احسن و التنافس بين التجار واضح مافيه تحالفات و تثبيت اسعار. السوق مفتوح و الاسعار تتفاوت من واحد لواحد بشكل كبير يعني يبالك تكاسر و تفتر و النوعية احسن بوايد من الي في بوظبي .

ما ادري وين حماية المستهلك ولا البلدية عنهم . انا عن نفسي قررت ما اشتري الا من العوير السوق. كبير وبعيد عن الزحمة.

وسلامتكم

9 thoughts on “أبوظبي و استغلال تجار الفواكه للمواطن”

  1. .

    .

    يبالكم اتسوون حملهوماتشترون


    خل اتخيس عندهم الخضره والفواكه

    بيظطرون ينزلون السعر

    مثل ماسوت وحده من الدول الاجنبيه ما اذكر اي دولة بالضبط

    لكنهم سووا حملة ضد الباعه الجشعييين اللي يبيعون البيض

    فاضطر التاجر انه ينزل السعر اقل عن السعر الاصلي قبل رفع الاسعار!!

    برافو عليهم بصراحه

    .

    .

    صدقك ^_^ بس عندنا فالبلاد احسن حملة تسويها …… حملة حج و عمرة . اما حملة مقاطعة و حملة احتجاج ماحد درى بك ^_^

  2. ولخيبة طلعت من بوظبي لدبي علشان الفواكه !!

    شو فيها الشيخ . تراه سوق الخضرة على شارع الامارات برع دبي يعني شغلة 45 دقيقة ولا سرقة المهندة . ادفع ونا مقتنع بالشي احسن من الاستغلال

  3. من شهر كنت ابغي اشتري سله فواكه جاهزه من المينا

    قالي بــ 150

    ونفس الي عرضها عليه خذيتها من بني ياس بــ 70 درهم

    سرقه عيني عينك

  4. .
    .

    يبالكم اتسوون حمله وماتشترون

    خل اتخيس عندهم الخضره والفواكه

    بيظطرون ينزلون السعر

    مثل ماسوت وحده من الدول الاجنبيه ما اذكر اي دولة بالضبط

    لكنهم سووا حملة ضد الباعه الجشعييين اللي يبيعون البيض

    فاضطر التاجر انه ينزل السعر اقل عن السعر الاصلي قبل رفع الاسعار!!

    برافو عليهم بصراحه

    .
    .

Comments are closed.