النصب بشكله اليديد

السلام عليكم و رحمة الله و بركاته,,

مرت في مواقف متتالية في الفترة الاخيرة نبهتني على امور ما كنت منتبهه لها,,

يعني في نظري البيزات اتي و اتروح و هي شي دنيوي,, و ما لها قيمة جدام الامور الاسياسية مثل الايمان و الاهل و الاصدقاء و الصحة,,

لكن يا جماعة الخير لاحظت شي جعلني ما اشعر بالاطمئنان كل ما سرت اشتري شي,,
بخبركم بالمواقف التالية عسب تتوضح الصورة,,

– اسير الكارفور و ادفع و اخذ الفاتورة و اكتشف عقب فترة اني دافعه مرتين على سلعة وحدة و يبين عندي ان قيمة السلعة ما اتنقصت من الفاتورة عقب ما الكاشير حسب الاحساب,

– اتصل في الصالون و اسأل عن سعر الحنا و يعطوني سعر و يوم اوصل اشوف بروشور الخدمات و اسعارها و اختار الخدمات اللي ابغيها و اخر شي ادفع 20 ال 30 درهم زيادة على كل سلعة و يوم اقولهم هذي مب اسعار البروشور يقولون انه جديم و الاسعار اتغيرت,,

– اسير الكوفي شوب و اطلب شي اضافي “جبن” مع السندويشة و اتيني من غير جبن لكن السعر محسوب في الفاتورة,,

– اسير الكوستا اطلب اشياء و الاسعار معروضة و واضحة, و بسهولة اقدر احسب اجمالي طلباتي,, و وقت الدفع حسبتهم اكثر من حسبتي و يوم اطالب بالفاتورة اترد الكاشير اني فريت الفاتورة,, و انا توني عندها اتريا طلبيتي اتخلص,,

– انسير المطعم, ايبون لنا الفاتورة, فيها طلبات ما طلبناها, و يوم نسأل شو هذي الوجبات اللي ما ما حتى سمعنا فيها, يردون سوري بالغلط,,

– اسير محطة البترول ابغي ادفع اب بطاقة الرحال,, و طبعا واضح المبلغ البترول على جهاز مضخة البترول,, انصدم الفاتورة غير عن اللي ظاهر على الجهاز, اسأل و يخبروني ان في واحد ما دفع بترولة بضفنا حسابه على حسابج,,

– اخوي ياخذ ملابسه من الدوبي و يكتشف 4 دراهم على كل خدمة,

-هذا الموقف خطير نوعا ما,, اصبحت الصيدليات مكان تجاري اكثر من انه مكان لبيع الادوية و العلاجات,, المهم كنت سايرة الصيدلية اشتري ادوية معينة وصفلي اياها الدكتور,, اتيودني راعية الصيدلية جنها وحدة اللي في محلات التجميل و اطلع عيوب الدنيا في ويههي و انا الحمد لله ما فيني شي من اللي قالته,, و اخبرها انا اعرف شو استخدم و ما ابغي ايرب اشيا يديدة ما اعرفها, بس سالتها شو عندج حق امي,,

راوتني كريمات ما تجاعيد الويه عقب ما خبرتها ان امي عمرها فوق الاربعين,, و عقب قالت انتي بعد عندج تجاعيد و لازم اتوقفينها,, انقهرت حزتها و قلتلها انا عمري نص عمر امي كيف فيني تجاعيد,, يعني بالغصب فيني تجاعيد؟؟ كانت تبغي تزرع فيني فكرة غلط و تجعلني اتوهم شي غلط, بس عسب اشتري اغراضهم و يربحون,, و الله حرام عليهم,

المواقف وايدة,, لكن هذا اللي قدرت اذكره,,

هي امور ما ادري اذا كانت اتمر و انا ما انتبه عليها و فجأة انتبهت عليها و انها امور يديدة,,
المهم,, يعني مال الانسان نعمة من ربه, و هذي النعمة ما ايوز يفرها جي و يسمح بسرقتها مثلا,,
اللي يستوي في نظري استغلال و استخفاف بعقلية المشتري و خاصة المواطن,, اصبحو اللي في المحلات و المطاعم يدفعون الناس قمية اشياء ما اشتروها,, و عادي ما يخافون و يقولون الناس بتدفع و عينها مغمضة,,

نصيحة لكم يا جماعة الخير,, انتبهوا على فواتيركم,, الحمد لله نحن في بلاد الامن, و انعرف ان محد بيتجرأ يهف شنطنا و لا ابواكنا,, لكن الخوف اننا ننصرق و نحن مب حاسين,,

و الفكرة الاهم,, هذيل اصحاب هذي الحركات البشعة لازم يعرفون ان اللي جدامهم فاهمين لعبتهم,,

اسمحولي طولت و مللتكم مع موضوعي,,