السلام عليكم ورحمة الله وبركاته

مرحبا اخواني

هذا اول موضوع اكتبه في المنتدى

بس بصراحه متضيجه من الخاااااااااااطر ………..

يعني درسنا في الجامعه والحمد لله وكرفنا وكنا من (طلاب المنح) التابعه للبلديه ………على أمل انهم يوظفونا بعد ما نتخرج “صحيح انه في العقد ماشي يلزم الطرف الثاني بانه يشغله” …….المهم

تخرجنا والحمد لله بمعدلات فوق ال3 وكلنا طموح وأمل …..قلنا اللحين الكل بقولنا (اهلا وسهلا) … واولهم البلديه ….ليش لا واحنا كنا طلاب متميزين في الجامه؟؟؟

للاسف اول الي رفضنا هم البلديه ….. قلنا ما عليه بنصبر عليهم ع قولتهم اعادة هيكله …. قلت لهم بتدرب عندكم ع الاقل … والي فاجئني انهم ما يبون يدربونا (مع انه يحق لنا ندرب عندهم بعد ما نتخرج) … بس لسبب ما قالو لا

المهم مرا الايام وانا اربع من مكان للثاني وما خليت بقعه ما وصلت لها اوراقي حتى دبي والشارجه …مع اني مستحيل اشتغل هناك بس قلت عن خاطري احس انه حد يبانا …. هب ماخذين شهايد ع الفاضي..

مره في شهر رمضان دقو لي انهم يبون السي في واعبي فورم مطرشينه ع النت من البلديه …..استااااااانست قلت يا الفرج اخيرا (الحمد لله)

مرا اسبوعين وردو دقو لي (والله ما وصلنا شي) رديت طرشت خلاف مر شهر ردو دقو لي (والله ما وصلنا شي) رديت طرشت وقلت لهم تاكدو وصل ولا لا؟؟؟ ……. قالو اوكى وصل

وبعد شهر بعدهم ردو وقالو ما وصل ……….بصراحه كان خاطري اظهر من سماعة التلفون من الغصه … قلت لهم اوكى انا اللحين يايتنكم وبيب الفلاش ميمري مالتي ويايه وسرت لهم وعطيهم اياهن وتاكدت انها نزلتهن ويبت ويايه هارد كوبي بعد

المهم ………اللحين يمكن مرا 3 شهور وع اساس فيه مقابلات وامتحانات واكثر الي اتخبرهن يقولن سارن وقابلا وامتحنن ……..وانا ولا حتى حد فكر يقولي ما نبيج……. اخاف حتى ورقي الي عطيتهم اياه بايدي ما وصلهم !!!!

زين ليش يتعبوني ويخلوني احلم بوظيفه..؟؟؟ ليش من الاول ما يقولون انهم ما يبوني ؟؟؟ كان اهون عليه تقولي سوري ماشي شواغر ع انها تقولي بندق لج للامتحان والمقابله

حتى رحت قدمت عندهم مره ثانيه هب ع اساس اني طالبة منحه ولاشي جديد

اللحين بكمل سنه كامله متخرجه ……. وكل يوم اتريا الفرج … وكل يوم ادقدق للموسسات ….. ولين اللحين اقدم

صح اشتغلت في شركه خاصه بس مافي شي يشجعني اتم …كل شي يشجعني ادور الاحسن من وظيفتي الحاليه

والله قهرررررررر ………… باجر شكلي بدق البلديه وبتهازب وياهم بقولهم اذا ما تبونا ليش تحطون عندنا امل بالشغل؟؟؟

خبروني شوه اسوي؟؟

24 thoughts on “>_<شوه اسوي؟؟”

  1. حالي من حالج الغاليه انا متخرجه الاولى بمرتبة الشرف … ولكن ما حصلنا اي تشجيع … وبلاخير الشهاده مفروره في السده لين ما يتصلون ويقولولنا تقدرون تكلمون او تشتغلون

    مبروووك عليج ماشاء الله عليج

    لاتزعلين

    انا امتياز مرتبه شرف 2

    ووين اشتغل في قطاع خاص
    الحمدالله

    سبحان الله راعين الامتياز في بيوت و الناس ممسكينهم مناصب

    الحمدالله شو بنقول بس

  2. اختي عليج بالصبر انا متخرج من سنه والله ويلين الحين ماحصلت وظيفه بتخصصي ولا بشهادتي الجامعيه

    ولكني راضي بالمقسوم ولله الحمد

    والله اتصلوا فيني دبي القابضه كم مره يبون واحد عنده تخصصي وبسرعه جدا بس يوم سالتهم مجال شغل القسم اللي بنحط فيه قالولي السياحه والفنادق (خمور وملاهي وسفريات مع الاجانب)

    تعذرت لهم ووالله ردوا اتصلوا فيني ثاني مره وطلبوني وطنشتهم…معنه في امتيازات وحوافز ولكن افضلي ابعد عن الشبهات

    ومن ترك شيئا لله عوضه خيرا منه

  3. حالي من حالج الغاليه انا متخرجه الاولى بمرتبة الشرف … ولكن ما حصلنا اي تشجيع … وبلاخير الشهاده مفروره في السده لين ما يتصلون ويقولولنا تقدرون تكلمون او تشتغلون

    ما شاء الله عليج

    لا انا معدلي (جيد جدا) .. الحمد

    يالله عسى خير يا اختي

    كل حد يدور من صوب …. استغرب هل الوظايف انقرضت؟؟؟؟

    احنا هب من كثرنا في الدوله

    وع كل هالخير الي فيه الدوله والحمد لله والتطور الي عايشينه بس اصعب شي نحصله الوظيفه !!!!

    بس اكييد بيي يوم نحصل الي نطمح له ان شاء الله

  4. بعد فتره بيفتتحون المنطقه الصناعيه التابعه لل (المؤسسه الاقتصاديه العليا المتخصصه) في العين

    طبعا المقر الرئيسي ببوظبي وهي مؤسسه تابعه لحكومه بوظبي وهذا النوع من التخصصات مطلوب عندهم (ورواتبهم تعد الاعلى بالاماره) وانا راح اشوف واحد من الاهل اذا في استقبال للطلبات وبرد عليج ان شاء الله

    وعندج المصارف الاسلاميه مب معقوله مافيها شواغر تخصصج مطلوب اختي

    واصبري ان الله مع الصابرين

    في العين ……. يزاك الله خير اخويه ما تقصر

    يا ريت يفجون عندنا شي في العين …. بس الخوف تلعب الواسطات بعد ونضيع احنا بلا شي

    انا بعدني بتم ادقدق للموسسات اشوف يمكن الله يفرجها ونحصل لنا وظيفه مناسبه

    مشكور اخويه ما تقصر

    ربي يحفظك

  5. خلونا ما نجامل بعض .. و نرضى بواقع إن توطيــــن الوظايف ما هي الا حروف على ورق فقط

    و إن حصل و تم التوظيف ف للتباهي بأن البنك الفلاني أو المؤسسة العلانية وظفت مواطنين و عقب يشتغلون عليهم و يطفرونهم بطريقة غير مباشرة ..

    لنا الله ,, والله يعينج اختي و ان شاء الله ربنا يحقق أمنيتج وما يضيع تعبج سدى
    قلوبنا معاج

    والله يا اخويه عفنا هالشعارات الي ما منها تنفيذ …. كلهم في معرض التوظيف يعيدون هالرمسه وفي النهايه شوه يتحدون بس منوه جمع اكثر عدد من الcv علشان يكتبون عنها في الجريده … بس وين التوظيف ؟؟؟؟؟

    زين اذا احنا ما بنخدم بلادنا منوه بيخدمها؟؟؟؟ ….. اذا دراستنا وشهايدنا مب عايبتنهم مع انها ع النضام الامريكي العالمي وكلهم يقولون مطلوب ومطلوب ….

    وفي النهايه ماشي مطلوب غير …………رحمة الله

Comments are closed.