حشرح الثغرات بالمثال:
انا عندي منزل مكون من ثلاث طوابق يقدر بمليون جنيه وكل طابق ساكن اخ من اخواتي لكن البيت ميراث مشاع
والقانون بيقول لو العقار مشاع يتم التسديد من الورثة والمشكله ان البيت للسكن فقط وليس للايجار وده مايفرقش مع الحكومة
وحاندفع حاندفع
وانظر للنقيض واللي حايبين الثغره الخطيره:
احمد صاحبي عنده 4 منازل كل منزل يحتوي على دورين وكل منزل يساوي 400 الف جنيه يعني
عقارات احمد مجموعها 1600000 مليون وستمائة الف جنيه وايه اللي حايحصل مع احمد
قلك مش حايدفع حاجة خالص ..ازاي قلك القانون بيحاسب الوحدة السكنية او العقار كوحدة منفصلة
يعني لو واحد عنده بيت ب 500 الف جنيه حايدفع والتاني عنده 100 وحدة سكنية ب200 الف يعني الاجمالي
2000000000 اثنان مليار جنيه مش حايدفع لان كل وحدة لوحدها اقل من 500 الف جنيه
طب ازاي فين العدل حتى في تطبيق القانون
طب لو القانون ملوش دعوه بالفقير ليه عمل غرامة 2000 جنيه للي حايتأخر عن تقديم الاقرار الضريبي الخاص بالعقار
واللي بيقول انه مش للفقير صدقوني القانون ده حايضر ناس كتير واكثر ناس هما الفقراء كعادة الحكومة
***************************************************************************
النتيجة اللي انا متوقعها هي لو صاحب العمارة اللي فيها شقق متأجرة وصاحب العمارة دفع الضريبة العقارية
طبعا عارفين صاحب العمارة حيعوض الفلوس دي من مين (((((الساكن الغلبان))))))
ولو نصيب كل ساكن 100 جنيه صاحبنا حايرفع الايجار200 طبع الكل عارف
******************************************************************
وربنا يخلف ظني
تحديث للسؤال برقم 1
وطبعا الناس اللي حتروح دلوقتي اهم حاجة انهم مايدفعوش ضريبة وحا يحددو ثمن اقل من 500 الف
بس الورق حايفضل عندهم والتقدير اللي جايبعد 5 سنين يكون العقار دخل في الشريحة ويدفعك الضريبة من غير ماتروح
ويقولك ده بيتك من 5 سنين كان ب 200 الف والنهارده بقى ب 600 الف ادفع يا حلو وطبعا النسبة اللي بيقولوا عليها ان اللي حايدفع الضريبه العقارية الان هما بس 5% من الشعب وان شاء الله بعد 5 سنوات النسبة
حتكون 40%
وتبدأالدولة تاجر لينا بيوتنا اللي تعبنا علشان نأسسها
والله انا مش متفائل؟؟؟؟
تحديث للسؤال برقم 2
على فكره حتيلو ضافوا المدارس والجامعات الخاصة الزياده على قفى الطالب او ولي امره
لان المدرسه حضرتك مش تدفعها من جيبها
المهم في الاخر القانون ده جاي علشان الفقير يزيد فقر والغني يزداد غنا والحكومة ماتقدرش على الغني
وكلنا عارفين ان الاغنياءناس واصلة وحتعدي من الضريبة العقارية زي السكينة في الحلاوة
