عمرى 18 سنة ، طالب فى أولى جامعة اتعرفت على وحدة زميلتى فى آخر الترم الأول بالصدفة ، وكانت من نفس محافظتى ، كلامنا كله كان ع الفيس بس أنا كنت أعرفها وهى
تعرفنى بس ما كلمتهاش فى الجامعة خالص ، بدأت العلاقة كزمالة ، كنا بنتكلم عادى ، المهم بدأت العلاقة تتطور شوية فى شوية ، بدأت تبقى صداقة ، بقينا نتكلم فى حاجات كتير وبنهزر وبنضحك ، لغاية دلوقتى تمام ،
كنت أول مرة أكون صداقة من طرف آخر ، اتكلمنا عن ...العلاقات العاطفية وكدا ، قالتلى انها مش مؤمنة بيها ، وان الوحدة ما ينفعش تكلم واحد قبل ما تتخطب ودا كلام جميل ، شوية شوية ، بقيت أحس ان جوايا احساس
جديد ، اتعلقت بيها ، مع العلم انها انسانة كويسة أوى محترمة أوى ، بجد كانت بتعاملنى على انى أخوها ، مع العلم انها مش ليها اخوات شباب ، كنت بحس منها انها حنينة عليا أوى ، دايما تطمن عليا وكنت جاتلى
فترة كنت تعبت فيها ، كانت دايما عامل ايه وبتاخد دواك ولا لأ وتوصينى انى أهتم بصحتى ، بس كنت عارف ان كل دا أنا بالنسبة لها صديق وبس أو إنسان وثقت فيه ، اتعلقت بيها أكتر ، بس فقت من حلمى الوهمى اللى
مستحيل يتحقق انها تكون فى يوم من الأيام زوجة ليا ، عشان السن وكدا ، دى يا ما دوبك كلها سنتين بالكتير هتكون مخطوبة وشوية كمان هيكون عندها عيال ، والشاب فى الزمن دا مش بيفكر يخطب الا بعد ما يلاقى وظيفة
على الأقل بيكون عنده 24 سنة ودا أقل واجب ، فجأة لقيت نفسى بتغير معاها فى الكلام و أحسسها انى مش فاضيلها وكدا ودا كان غصب عنى ، لقيتها بتقوللى مالك فيك ايه انت متغير معايا ليه مش انت دا اللى أنا أعرفه
، قلتلها مفيش ، مع العلم ان لو كان حد فينا فى حاجة مضايقاه بيحكيها للتانى والتانى بيساعده فيها ، قالتلى لأ فيه ، بجد انت فيك ايه ؟ ، قلتلها لما أتعلق بوحدة لدرجة الجنون وأبقى متأكد انها مش ليا أبقى
غبى صح ؟ وأنا طلعت غبى ، أهو انا كدا اتعلقت بيكى اوى ، حلمت بيكى اوى بس عارف انه طريق مسدود ، عارف ان انتى خلال سنوات قليلة هيكون عندك أطفال ، وأنا مش قادر أتخيلك كصديقة ، قالتلى وفيها ايه لما نكون
أصحاب قلتلها مش هينفع مش هينفع ، أنا لازم أبعد لأن لو كملت هتعلق أكتر وحياتى هتدمر ، وأنا مش على استعدادا انى أدمر حياتى ، وأنا احترمتك أوى وقدرتك أوى ، وانتى انسانة جميلة أوى ، بس مش هقدر أكمل ،
قالتلى أنا أول مرة أبكى عشان واحد فى حياتى ، وأنا كنت وثقت فيك ، وانت كنت غالى عليا أوى ، قلتلها وانتى بالنسبة ليا كنتى كدا وأكتر ، قالتلى طيب هتمسحنى من الأصدقاء ، قلتلها يا ريت تيجى منك انتى عشان
مش هقدر ، قالتلى وأنا كمان مش هقدر ، قلتلها خلاص يبقى أنا هضطر أعمل كدا ومن ساعتها وأنا دايما سرحان مش بتغيب عن بالى كنت فاكر نفسى هرتاح ، بالعكس أنا تايه ، وتعبان أوى ، ودايما بفكر فيها ، ومش عارف
أفوق ، مع العلم انى أساسا مش عاطفى أوى وبعرف أتأقلم وأعيش الواقع ، بس بجد مش قادر أفوق ، أعمل ايه ، أرجو المساعده لو حد عنده حاجة يا ريت ما يبخلش عليا بيها
