يا للي فتحت البتاع (الاقتصاد)
فتحك على مقفول
لأن أصل البتاع (الانفتاح)
واصل على موصول
فأى شئ في البتاع (الفساد)
الناس تشوف على طول
والناس تموت في البتاع (الكلام)
فيبقي مين مسؤول ؟
وإزاي حتفتح بتاع (اقتصاد)
في وسط ناس بتقول
بأن هذا البتاع (الانفتاح)
جاب الخراب مشمول
لأنه حتة بتاع (السادات)
جاهل غبي مخبول
أمر بفتح البتاع (الاقتصاد)
لأنه كان مسطول
وبعد فتح البتاع (الاقتصاد)
جابوا الهوا المنقول
نكش عشوش البتاع (الغلابه)
وهد كل أصول
وفات في غيط البتاع (الفلاح)
قام سمم المحصول
وخلا لون البتاع (الزرع)
أصفرحزين مهزول
وساد قانون البتاع (الغاب)
ولا عله ولا معلول
فالقاضي تبع البتاع (الظالم)
فالحق ع المقتول
والجهل زاد في البتاع (العباد)
ولا مقري ولا منقول
والخوف سرح في البتاع (البلاد)
خلا الديابه تصول
يبقي البتاع في البتاع
( ) ( ) والناس صايبها ذهول
وأن حد قال دا البتاع (الانفتاح)
يقولوا له مش معقول
وناس تعيش بالبتاع (اللحمه)
وناس تموت بالفول
وناس تنام ع البتاع (الحرير)
وناس تنام كشكول كشكول(طاويه من الجوع)
آدي اللي جابه البتاع (الانفتاح)
جاب الخراب بالطول
لأنه حتة بتاع (السادات)
مخلب لراس الغول راس الغول (أمريكا)
باع البتاع بالمتاع (البلد)
وعشان يعيش على طول
عين حرس بالبتاع (السلاح)
وبرضه مات مقتول (السادات
