يا نهار ابيض محدش جاوبك من 5 شهور عيب والله
بس تلاقيك عملتها بس للي ميعرفش
انت تروح مديريه الامن بالاسكندريه - سموحه بدري اوي يعني تتوكل علي الله تكون هناك الساعه 7 بالكتير اوي هتلاقي الناس بتكتب الاسامي بالترتيب وبعدها هيجي حد من المديريه ياخد الكشوف دي وينادي عالاسامي
وياخد منك بطاقتك الرقم القومي ويديك رقم , وتقوم داخل جوه المديريه بالرقم ده تطلع السلالم وتخوش الباب الشمال وتطلع كام سلمه تلاقي مكان واسع شويه كده وفيه مدخل ممر علي ايدك اليمين تخوش الممر المنخفض في
الاخر فيه اوضه عالشمال بتاعت الكمبيوترات هتقف في الصف مع الناس لحد ما يجي دورك وخليك في دورك متحاولش تسبق الدور لأنك مضطر تمشي بالارقام يعني مجرد ما تلاقي نفسك قدام الباب وطبقا للأرقام هتلاقي اللي
بينظمو الشغل طلعو بطاقتك هتديهم عالباب الرقم اللي في ايدك هيديك بطاقتك وتدخل تستريح في التكييف 3 دقايق وتكون مجهز البطاقه في ايدك و 15 جنيه , فيه كمبيوترات للستات وفيه للرجاله فانت تستني لحد ما موظف
علي كمبيوتر يقولك اتفضل تعالا , تقوم داخل وقاعد قدامه وتديلو البطاقه وال15 جنيه هيسألك عايزها ليه ؟ تقوله حسب انت عايزها ليه يعني لو رايح الجيش قوله عايزها للتجنيد , او عايزها لوزاره كذا او عايزها
لنقابه كذا او عايزها للشركه الفلانيه متتكسفش قوله اسم الشركه لأن الفيش بيكون موجه. المهم هيقولك بص عالكاميرا وانت لابس النضاره لو لابس نضاره وهيقوم قايلك حط ايدك علي سكانر هتحط اربع صوابع علي الجهاز
اليمين والاربعه الشمال علي الجهاز الشمال في نفس الوقت وبعدين هيقولك حط صوابعك الابهام هتقوم حاطط الصوابع الابهام, بس يا سيدي تقوم واخد بعضك وقايله شكرا جزيلا وتقوم تخرج زي الباشا وتيجي بكره تستلمها
من المكتب اللي بره , المكتب ده زي ما قلت كده وانت طالع المديريه هتخش الباب اللي عالشمال وتقوم طالع 4 سلالم هتلاقي قدامك صاله كبيره فيها ناس واقفه كتير متعرفش مستنيين ايه المهم انك هتلاقي علي ايدك
اليمين جمب المدخل اللي انت دخلته عشان تعمل الفيش هتلاقي مكتبين كده تقوله انا عملت الفيش امبارح هيقولك بطاقتك فين هتديلو البطاقه وفيه تقسيمه لإستلام الفيش يعني ممكن يقولك لأ دور عند الاخ اللي جمبي
تقريبا مقسمينها حسب الحروف مش عارف. بس ودي نهايه رحله الفيش والتشبيه في مديريه الامن
