انا شاب عندى 28 سنة ...بشتغل فى شركة محترمة للأدوية وعندى شقة ...حصلتلى حادثة وانا صغير تسببت فى اصابة فى رجلى الشمال وعملتلى قصر بطول 6 سم فيها
...اختارت امى بنت عمى علشان تكون خطيبتى لما شافتها فى فرح واحدة قريبتنا , وانا مكنتش موجود فى الفرح ده لأنى ماليش علاقة بعائلة ابويا , المهم بنت عمى دى انا مشفتهاش طبعا من وهى صغيرة جداً ولما شفتها
بعد ما امى حكيتلى عنها اعجبت بيها جداً ولقيتها بنت اخلاق وادب ومحترمة جدا وتمت الخطبة ومن بعد الخطوبة اصبحنا نار على زيت حار , محدش فينا بيطيق كلمة للتانى وهى بتعلق على كل تصرفاتى
وانا بصراحة كنت بضغط عليها فى الاسئلة على اساس انها خطيبتى وليا عليها حقوق وكنت بحس ديماً انها قاسية اوى وجافة اوى فى تعاملها معايا و كانت بتضايق لما اقولها كده وكانت بترفض الانتقاد ببكل اشكاله وانا
كان الجفاء كان تاعبنى جداً المهم حصل انى مرة حصلت مشكلة بينى وبين والدتى وهى كانت عندنا واتعصبت جامد جداً ولما هى حاولت تدخل علشان تهدينى اتعصبت عليها واتخانقت معاها ورميتلها الدبلة وده
والله عارف انه غلط كبير جداً وانا معترف بيه بس ربنا يعلم انا مكنتش حاسس ابداً باللى بعمله المهم هى انسحبت واخدت الدبلة ونزلت وامى والدى بيحاولوا يهدوها من حالة الانهيار اللى حصلتلها وانا لما
فوقت من العصبية اللى كنت فيها نزلت وراها علشان الحقها ...ولما لحقتها واتكلمت معاها سمعتنى و قبلت انى اخد الدبلة تانى واعتذرتلها لكن هى مقبلتش الاعتذار وده كان باين عليها وعلى ردها عليا ...بعد اللى
حصل ده بيومين عرفت انها هتتحجز فى المستشفى بسبب تعب والدكتور اللى كشف عليها قالها ان ده تعب نفسى مش اكتر بعد ما عملولها كشف على الزايدة وطلعت كويسة ...بعد ما طلعت من المستشفى كلمتها لقيت طريقة كلامها
معايا من تحت الضرس وبالحد والمصلحة ...فضلت الح عليها واحاول اعتذرلها لكن هى كانت واخدة القرار بالانفصال وانى لازم اجيب ابويا علشان انهى الموضوع لكن انا رفضت لأنى بحبها وقولتلها انتى لو عاوزة تسيبى
قولى انتى المهم رحت لعمى واتكلمت معاه واتكلم معايا بكل ذوق ووصلنا بعد نقاش طويل الى انها محتاجة فترة راحة وانها فى الفترة دى هتفكر افضل .... لكن انا متمسك بيها وربنا يعلم انى مش عاوز
انفصل عنها ابدا ... هى كان ردها على عمى لما سألها مالك قالت انى لحوح وعندى وعصبى وهى بقت بتخاف منى ... وانا قلت انها جافة اوى وقاسية فى مشاعرها اوى وغامضة اوى وكتومة وقليلة الكلام وانا ده بيخنقنى
....عمى بعد ما قعد معااي قاللى يا ابنى لازم تبقى تقيل شوية وتكون انت اللى ماسك الدفة بالحب والحنان مش بالمرجلة الفارغة لكن انا قولتله انا بتعب لما بلقيها ساكتة ومش بتحب تحكيلى اى حاجة وبحس بجمود فى
مشاعرها . فأنا عاوز اعرف ازاى احافظ عليها وازاى اتعامل معاها مع احساسى بنسبة 70 % انها عاوزة تبعد .....غير ان احساسى بالنقص من اصابتى بيخلينى وانا عارف ان ده عيب بيخلينى اضغط عليها اوى واخاف
انها تسيبنى لأنى بحبها .
تحديث للسؤال برقم 1
والله ردودكم دى على راسى من فوق وانا بشكركم على الرد... لكن المشكلة انها طلبت وقت علشان تفكر وانا مش عاوز اسيبها ابدا لأنىى بحبها ومش متخيل فكرة الانفصال...بالله عليكم
المفروض اعمل ايه؟؟
تحديث للسؤال برقم 2
تم الانفصال
